شعبطة الحلقة الرابعة – التجربة السنغالية


مساء الخير يا شباب! و أهلا بيكوا في حلقة جديدة من شعبطة ! المرة دي هتكلم عن احد تجاربي الأفريقية و دي كانت في دولة السنغال الشقيق

في 2013 رحنا أنا و صديق ليا نحضر مؤتمر في السنغال و كانت البداية مبشرة جدا جدا جداً ! طبعاً  أول حاجة مفيش طيران مباشر من القاهرة فا الحل يتلخص أني يا ألف علي أربع أو خمس بلاد أفريقية شقيقة أخري قبل ما أوصل أو أني أروح باريس و أطلطع هناك 7 ساعات ! و طبعاً بعد تفكير عميق لم يتعدي ال 15 ثانية ! قررت أنزل في باريس ! و فعلاُ حصل و نزلت ! أحب أضيف أن الجو في القاهرة كان برد 15 درجة ! باريس كانت تلج 0 درجة …. لما وصلت لأخواننا في دكار كانت درجة الحرارة 35! بسترة يا عزيزي علي أعلي مستوي ! أي والله !  مشكلة دي ؟ لا مش مشكلة ! المهم … وصلت … الطيارة هبطت … نزلنا من الطيارة علي السلم .. أبص يمين.. أبص شمال .. مفيش أتوبيس و لا أيتها حاجة .. بصيت قدامي كله مفلق و بيجري علي مبني قدامنا ..قوم ايه ؟؟؟  عملت زيهم …طلع ده المطار … دخلت مبني كله معمول أكنه المكاتب الحكومية بتاعة التسعينات عندنا ! اللي هي كرتون مقوي و ألوميتال… مكاتب المطار طلعت كلها كده …المهم خلصت الجوازات و اللذي منه .. و هوب ببص لقيت نفسي في الشارع… من ساعة ما الواحد بيدخل و بيخرج من المطار أكنه  بالظبط عدي في ما يوازي طول ملعب سلة  أو كرة يد ! أصغر مطار شفته !!

المهم لما خرجت بقي أكتشافي التاني كان الناموس !! هيييييييييه بالزوفة … كل ما تحرك ايدك بتهش !! و ما يمنعش أنه ممكن تكون بتهش حاجات تانية في السكة أنت ما أنتاش عارفها و فاكرها ناموس ! عادي يعني !!

ما علينا .. أتوفقت و لقيت الأتوبيس و رحت الفندق… تاني يوم كان يوم الجمعة و قررت أنا و زميلي نروح نصلي الجمعة … شئ عادي المفروض يعني … المهم سألنا فين الجامع و صفولنا … دغري في شمال .. و تاني يمين في يمين … و الي حدي كبير كان الراجل مظبوط … بس هو نسي حاجة واحدة بس !! أنه يقول انه الدغري دا بتاع 2 كم !!! أتقورنا يا ريس تحت الشمس … بس وصلنا يا شباب للجامع … و قعدنا في الظلة زي الفل … ترتيب الجمعة في عقلي .. هي أقامة الصلاة … الخطبة .. ثم الصلاة نفسها …

هناك لما قعدنا كان الشيخ بيتكلم سنغالي في ما فهمناش أي كلمة … فتوقعت أنا أن دي الخطبة و زميلي قال لأ دا درس دين و بعدين هيقيم الصلاة و يخطب…. قعدنا  نستني أن الدرس يخلص ! ربع ساعة .. مفيش! نص ساعة مفيش … ساعة الراجل الشيخ كان بيدي الدرس بالسنغالي .. وأحنا قاعدين زينا زي البلاطة اللي أحنا عليها … بس خلص المهم و أبتدي يقيم الصلاة … حلو قوي !! خلص و راح مقيم الصلاة تاني مرة .. ايه يا عم ؟  خلص و راح أقامها تالت مرة … الله ايه العبارة؟  و هوب … راح مبتدي الصلاة … مفهمتش أي حاجة بس عملت زي الباقي قمت صليت علي الأقل دي كانت مفهومة لأن الصلاة بالعربي ..و خلصنا و رجعنا طبعاً ال2 كيلو مشي زي البشوات …

في يوم تاني خدونا بتوع المؤتمر في رحلة لحتة اسمها جزيرة جوريه و دي كانت الجزيرة اللي بيتباع منها العبيد .. و ورونا بيوت المستوطنين بألوانها المختلفة .. أزرق للفرنسيين … و أحمر للهولنديين , و أبيض أو أصفر للأنجليز.. خدونا بعديها ورونا أخر بيت عبيد سايبينه و عاملينه متحف .. و شرحولنا ازاي الناس كانت بتتساق زي الحيوانات و تتحبس و تنفصل عن عائلتها .. حاجة مؤلمة و صعبة وظروف مزرية .. المهم … الراجل اللي كان بيشرح لنا .. حكي الحدوتة و كل شوية .. و الأوربيين عملوا و الأمريكان سووا .. و الفوج بتاع المؤتمر كان فيه أوروبيين و أمريكان و كل شوية الناس تحس بالكسوف من اللي ببشوفوا أو بيسمعوا أنه كان بيتعمل .. و كل ده  و أنا و زميلي التونسي نضحك في خبث .. قال يعني خليهم يشوفوا ! و المهم جه الراجل قبل ما نمشي بخمس دقايق و راح  فاقع الزنبوق المتين !! “و كمان العرب كانوا بييجوا يشتروا عبيد!”  … رحنا أنا و زميلي عملنا عبط .. محدش كده كده كان عارف أننا عرب! أنما حاجة تكسف بشكل !!!

خلص اليوم ده و جه أخر يوم في المؤتمر و قالوا في حفلة عشاء و عرض فولكلور .. و طلع يا عزيري القارئ هو عرض هددور مش فولكلور !!

دخلنا القاعة اللي في حجم قاعة فرحة عادية تشيل ما يفوق ال200-300 شخص … و لقينا أنهم مقعدينا كلنا جنب بعض 10 طرابيزات كل طرابيزة 5 أفراد .. و جايبني ساوند سيستم  أكنه لل300 شخص .. فا أحنا كنا بنطرش !! رسمي فهمي نظمي !!  و الصوت كان كفيل أنه يهد الفندق باللي فيه !!  و صوت المغني ممكن يكون عبارة عن ميكس  ما بين صوت  فيل حزين  ممزوج بشلة قرود بتعيط !!

وطبعاً أحنا كلنا أبتساماتنا جايبة و داننا !! أمال هنقول ده وحش ولا كخ !! دول ياكلونا يا ريس !!

و بعد نص ساعة .. دخلت القاعة مجموعة من البنات لابسيين زي موحد تقليدي و معاهم واحد مفقع و رفيع جداً … من الملاحظ في البنات عدم تشابه أحجامهم اللي بتتراوح من  رفيعة .. لعادية… لفوق العادية حبتين تلاتة اربعة … المهم … الراجل المفقع خد الميك و أبتدي يغني .. و كان صوته أسواء من الأغانية اللي كانت شغالة قبل كدة … صوته مشجع للأنتحار الحقيقة و البنات أبتدي تغني كورال و تهد الأرض من تحتينا قصدي يرقصوا … الرقص الحقيقة كان مبهر لأنه كان واضح جدا أن عامل الحجم عندهم لا يشكل أي مشكلة و ناس مرنة مرنة مرنة مرنة الصراحة … هي بس المشكلة كن في ال6 أو ال7 اللي بيرقصوا  3 مثلاً الأحجام الفوق عادية فا لو حركة فيها نط مثلاً كان بيوصل للطرابيزات هزات 3-4 ريختر عادي يعني !!

بعد معاناة  لمدة نص ساعة … اتسرسبت و خرجت بره القاعة و لقيت تقريباً نص القاعة معانا !  بس طبعاً ما كانش يصح نفضل بره فكنا عاملين زي اللي بيعمواً بنطلع ناخد نفس .. و نرجع جوا تاني شوية !! لغاية لما الحفلة خلصت و أحنا كنا عاملين زي اللي طالعين من خناقة … و بنحاول نفتش علي الطريق انه نرجع الأوض بتاعتنا !!  و الحمد لله و صلنا و تاني يوم خدنا سكة العودة للقاهرة …

و توتة توتة .. فرغت الحدوتة ! سنغال ولا منتوته ؟؟؟؟

و منجيلكمش في حاجة وحشة !!!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Sableyes

Sabbles woz 'ere

Michael Ehrhardt

Permanenter Ausstellungsraum

The Neighborhood

Society online's creative conscious.

Dates & Saffron

Digging into my middle eastern roots one stew at a time

thaqafamagazine.wordpress.com/

ARAB THOUGHT / ROOTS / CULTURE

Sharing History

Reflections of a Public Historian

Matt Miklic

Designer, and other useful things.

Author Mccloskey Speaks

A great WordPress.com site

3rdculturechildren

life of a globetrotting family of 5 in the US foreign service

purelysubjective

working out how to be an artist in this world

In Sight

"A moment's insight is sometimes worth a lifetime's experience" - Oliver Wendell Holmes

Her Life Inspired

A parenting and lifestyle blog that features parenting advice, recipes, DIY ideas, fashion tips and inspiration

2Summers

An American in Quirky Johannesburg

%d bloggers like this: